Om te verstaan hoekom spesifieke wyne meer uitsonderlik in karakter en mondsensasie as ander is, moet mens eenvoudig net proe. Die eerste 2018 US Woordfees Ouwingerd-erfenis-wynproe het op 6 Maart 2018 by Spek en Bone plaasgevind waar sjef Bertus die ouwingerdwyne gekomplementeer het met van sy beste wynkroeg-tapasgeregte.
Sjef Bertus Basson
’n Uitgelese groep van 32 gaste wat spesifiek belangstel in die uniekheid van ouwingerdwyne (gemaak van wingerde wat 35 jaar en ouer is), het ’n stewige keuse van 11 wyne deurgeproe. Dit was ’n diverse spektrum wat bestaan het uit die enigste ouwingerd chenin blanc Kap Klassiek as verwelkomingsdrankie (Huis van Chevallerie Filia – magnumformaat), chenin blancs van Sadie Familiewyne (die gesogte en raar Mev Kirsten), Nuwedam, Bosman, ’n sémillon elk van Boekenhoutskloof (’05) en die Antonij Rupert-wyn Laing Groendruif, sowel as die Mullineux Old Vines wit versnit. Die rooiwynkeuses was ’n Naudé-cinsaut, die Fairview Pegleg-carignan en die Meerendal Erfenisblok-pinotage. Daar was geen nagereg nie, maar wel ’n Daschbosch-hanepoot gemaak van ’n 117 jaar oue blok in die Breedekloof.
Almal was dit aan die einde van die aand eens dat die wyne van ou wingerde ’n uitsonderlike tekstuur, mondgevoel met ’n natuurlike helderheid bied. Elke wyn het ’n storie, gewoonlik gewortel in generasies van wyndruiweboere wat die wingerde saam met hul wingerdwerkers met sentiment en begrip versorg.
Terwyl wingerdpioniers soos Charles Back van Fairview en Marc Kent van Boekenhoutskloof reeds geruime tyd die waarde van hierdie ou blokke erken het, is daar ’n oplewing in die huidige wynmakersgenerasie, jonk en oud, om die ouer blokke se integriteit en potensiaal deur spesifieke wingerdpraktyke te bewaar.
Wynmakers woon tipies hierdie geleenthede ook by en voeg kleur, dimensie en die menslike element by die gaste se ervaring. Teenwoordig op hierdie aand was Frik Kirsten, mev Kirsten se seun en bewaarder van hierdie oudste chenin blanc-blok in Suid-Afrika, sowel as Christa von Le Chevallerie, wat haar Nuwedam-chenin blanc onlangs vrygestel het. Laasgenoemde is die eerste Old Vine Project- (OVP-) lid wat die Certified Heritage Vineyards Seal op ’n bottel vertoon. Hierdie seël waarborg die ouwingerdstatus en dat dit deur Sawis-rekords en die OVP gesertifiseer is.
Frik Kirsten, eienaar van die die Mev Kirsten-wingerd
Christa von Le Chevallerie, Huis van Chevallerie en Nuwedam
Die waarde van weldeurdagte wingerdboukunde met ’n langtermynplan is bevestig deur die eienaar-wynmaker Kevin Arnold van Waterford, wat hul 31 jaar oue chardonnayblok voorberei vir ouwingerdstatus oor minder as vier jaar.
Besoek gerus www.oldvineproject.co.za vir meer inligting of e-pos André Morgenthal by marketing@oldvineproject.co.za.
